Kala kayman et ngo man!

Igyan nak kamanemnemnem, nihaya ngon ma-dem
Agak piyan ni manemnem, men tawey tep amon naldem
Pohok amon nalaem, hugat an la dimelem
Hapa amon dagem et kantay ilellelgem

Agak amta nem hipa ngata i mabelin ni ipapa
Hiyay ag ma-gah koma, haya ka da ay lowa
Igyan kita kamatama, kantay aliwada law oonga
Tep ahleg toy nandalnan da, et kanta koma ay hiya

Hina-dom kankoy tola da la....
Hotada pamagbaga ni kan pa na-mo ay hobla
Nonta hi-gayo pay i oonga, namahig ngo hota gaya
Tep kami kamangaya, pehed idan yo inobla

Nihaya kamawada, dakel ida ngon baga...
Kantay tola da na-mo la a, pehed idan da impasa
Aamed tayo da, pehed koma ngoy itibew da
Di kadipohan da, man-iimih ida koma

Men piganto li na-mo ngo i kailakwahan yo?
Hapa mabelin ni heh-geden ko, i pan-ama-amagan yo?
Timpo ni palabah yo, hapa itaoli yo?
Amin kiho ag ombato, gandet ni matey kiho

Hi-gatayon totoo, gandet mampilli kiho
Piyan Diyoh, angel tayo... hipay onoden tayo?

No angel moy onoden mo....
Andi pampa-noan mo, babbawwi li lameh to
Ag mo ehlen ay kusto ni kan moy angel ko od ngo
Anhanet ngo...likna yo...hemek mi ni agpayso

Hapit Diyoh didingel yo, anhan et ngon ag yo limmo
Dakel ni inohal to, et kan yo met ay kusto...
At no di biyag yo tongpalen yo, biyag yo "palameh" to
Baka aliwan hallahoh, linibo et pay na-mo!

Oway to li keteg pango, igyan amon ag malangboh
Kolang idan hapit ko, ihulat ko li na-mo
Nabelod ni patawid ko, andi et man kayman ngo
Nem hemek Apo Diyoh, palotlotik ko li mango!